Siglir tar il cuntegn

Header

cuntegn

Ballape svizzer Köbi Kuhn è mort

L'anteriur trenader da l'equipa naziunala Köbi Kuhn è mort ils 26.11.2019 en la vegliadetgna da 76 onns. Il ballape svizzer perda ina da sias grondas figuras. Il 2011 era vegnì diagnostitgà tar Kuhn leuchemia. Fin october da quest onn era vegnì enconuschent ch'el saja vegnì mess sin l'intensiva.

Kuhn, che ha giugà tranter il 1960 fin 1977, ha er fatg 67 partidas per l'equipa naziunal. Cun il FC Turitg è Kuhn daventà 6 giadas campiun svizzer e ha gudagnà 5 giadas la cuppa svizra. Il 1966 ha il turitgais giugà al campiunadi mundial en l'Engalterra.

Trenader naziunal

Propi popular è «Köbi National» daventà sco trenader da la squadra naziunala. Sco coach ha Kuhn prendì part 3 giadas a turniers internaziunals:

  • CE 2004: Suenter otg onns absenza ha Kuhn manà la Svizra al CE en il Portugal. La squadra naziunala n'è dentant betg vegnida sur la fasa da gruppa or.
  • CM 2006: La squadra naziunala sa qualifitgescha per il campiunadi mundial en Germania. En l'otgavelfinal perda la Svizra cunter l'Ucraina suenter sajettar penaltis. Cabanas, Barnetta e Streller manchentan dal punct.
  • CE 2008: Sco co-organisatur sper l'Austria era la Svizra gia davent da l'entschatta sa qualifitgada per il campiunadi europeic il 2008. Gia suenter la fasa da gruppa è il turnier dentant stà a la fin per la squadra naziunala.

Il «svizzer dal onn 2016» ha terminà suenter il campiunadi europeic en l'agen pajais sia lunga carriera da ballape. L'avrigl 2019 ha Kuhn preschentà sia autobiografia.

Ord l'Archiv da SRF:

Video
La èra Köbi Kuhn
Or da Sport-Clip dals 21.06.2016.
laschar ir

RTR novitads 18:00