Siglir tar il cuntegn

Naziunal/Internaziunal Barcelona per la 24avla giada campiun spagnol

En la Primera Division, la pli auta liga da ballape da la Spagna, ha il FC Barcelona gudagnà per la 24avla giada il titel da campiun. Ed er en l'Italia e la Frantscha èn las stagiuns da las emprimas ligas da ballape a fin.

ballapedist Luis Suarez sa legra
Legenda: Luis Suarez ha fatg in hattrick e segirà il titel al FC Barcelona. Keystone

Era Real Madrid ha gudagna cun 2:0 cunter la Coruña e resta uschia sin il segund plaz, 1 punct pli pauc che Barcelona.

Spagna

Il FC Barcelona è per la 24avla giada campiun spagnol da ballape. Per il club èsi il 6avel titel aifer ils ultims otg onns. En la davosa runda ha Barça mantegnì ses avantatg minimal d’in punct sin il rival etern Real Madrid e gudagnà a Granada cun 3:0.

Luis Suarez ha sajettà tuts trais gols. Cun 40 gols è l’Uruguaian er il caposajettagols dalla Primera Division. Cristiano Ronaldo ha sajettà 35 gols, ils ultims dus tar la victoria da 2:0 cunter Deportivo La Coruña.

Italia

Per in nov record da gols ha procurà Gonzalo Higuain en il campiunadi talian. Er quel è ì a fin la sonda. L’argentin ha sajettà trais gols tar il 4:0 da Napoli cunter Frosinone. Cun 36 gols en ina stagiun ha Higuain battì il vegl record da gols. Quel aveva persistì per 66 onns. En la stagiun 1949/50 aveva il Svedais Gunnar Nordahl sajettà 35 gold per Milaun.

Grazia a la victoria da la sonda ha Napoli pudì segirar il segund plaz da la tabella, gist davos il nov e vegl campiun Juventus Torino. Juve e Napoli giogan en la Champions League. Il terz, l’AS Roma, dat la qualificaziuns per questa liga.

Frantscha

La fin da la stagiun da la Ligue 1 en Frantscha è stada en l’ensaina dal cumià da Zlatan Ibrahimovic. Il Svedais ha gudagnà ses quart titel da campiun franzos en seria cun Paris Saint-Germain. E quai cun in avantatg da betg main che 31 puncts sin Lyon e Monaco.

Tar il 4:0 da PSG cunter Nantes ha Ibrahimovic sajettà dus dals gols. Il caposajettagols banduna Paris cun 152 gols durant 178 gieus. Nua ch’il giugader da 34 onns cuntinuescha sia carriera n’è anc betg cler. L’emprim dat el anc il final da la cuppa franzosa cun PSG, lura cun la Svezia durant l’Euro en Frantscha.

RR novitads 20:00 / Sportissimo 12:00