Grazia a questa clera victoria resta Bayern München a la testa da la tabella. Suenter 4 da 6 gieus da gruppa ha Bayern 9 puncts sin il conto, tuttina blers sco Olympiakos Piräus ch’ha battì Dinamo Zagreb cun 2:1. Zagreb ed Arsenal han mintgamai 3 puncts.
Leverkusen perda malgrà in gol da Mehmedi
Bayer Leverkusen ha pers ordaifer encunter l’AS Roma cun 2:3. Sco gia avant duas emnas (4:4) han quellas duas equipas procurà per spectacul. Da pausa manava Roma cun 2:0. Suenter pausa ha Leverkusen pudì mussar ina reacziun ed egualisar la partida. L’emprim gol per ils Tudestgs ha sajettà il Svizzer Admir Mehmedi. La decisiun è crudada en la 80avla minuta. Lura ha Miralem Pjanic nizzegià in penalti al 3:2 per Roma.
En la tabella ha l’AS Roma pudì vargar Bayer Leverkusen. Roma ha da nov 5 puncts, Leverkusen 4 puncts. Suveran a la testa figurescha il FC Barcelona cun 10 puncts. Ils Catalans han battì a chasa Bate Borissow cun 3:0.
Zenit ina runda vinavant
En la gruppa H è Zenit St. Petersburg sa qualifitgada per ils otgavels-finals. Ils Russ han gudagnà a Lyon cun 2:0. Igl è stà la quarta victoria en il quart gieu per Zenit. En l’auter gieu ha Gent gudagnà surprendentamain encunter Valencia cun 1:0.
Chelsea mitscha cun in egl blau
Il FC Chelsea che sa chatta dapi l’entschatta da la stagiun en la crisa ha battì a chasa Dynamo Kiew cun 2:1. Igl è stà pir la segunda victoria en la Champions League per l’equipa da José Mourinho. En la tabella sa chatta Chelsea da nov sin il segund plaz, trais puncts davos Porto ch’ha gudagnà ordaifer encunter Maccabi Tel Aviv cun 3:1.
RR novitads 06.00