En la 77avla minuta ha Olivier Giroud nizzegià in sbagl dal goli da Bayern, Manuel Neuer, e manà Arsenal cun 1:0 en avantatg. Curt avant la fin ha il tudestg en il tricot dals «Gunners» fatg tut cler cun ses gol al 2:0.
En il segund gieu da questa gruppa ha Olympiakos Piräus gudagnà ordaifer encunter Dinamo Zagreb cun 1:0. En la tabella resta Bayern München er suenter trais gieus a la testa cun 6 puncts, tuttina blers puncts sco Olympiakos Piräus. Cun trais puncts suondan lura Dinamo Zagreb ed Arsenal.
Festival da gols a Leverkusen
En la gruppa E han Bayer Leverkusen e l’AS Roma procurà per spectacul. La finala han quellas duas equipas giugà pari 4:4. L’emprim è l’equipa tudestga ida en avantatg cun 2:0. Silsuenter ha Roma sajettar 4 gols en seria. La finala ha Leverkusen anc pudì egualisar er grazia al Svizzer Admir Mehmedi ch’ha sajettà quatter minutas avant la fin il 4:4.
Barcelona ha gudagnà ordaifer encunter Borissow grazia a dus gols d’Ivan Rakitic cun 2:0 e resta uschia a la testa da la tabella E cun set puncts, trais puncts avant Bayer Leverkusen.
Nagins gols a Kiew
Chelsea na vegn er betg sin turas en la Champions League. L’equipa da José Mourinho ha stuì sa cuntentar cun in pari da 0:0 ordaifer encunter Dynamo Kiew. Chelsea ha dentant er gì in zic discletg. Tant Eden Hazard sco er Willian han be tuc la pitga.
Cun dus gols curt avant la pausa ha Porto battì a chasa Maccabi Tel Aviv cun 2:0. L’equipa dal Portugal resta uschia cler a la testa da la gruppa G, trais puncts avant Kiew e quatter puncts avant Chelsea. Anc nagins puncts ha Tel Aviv.
Valencia gudogna grazia ad in autogol
En la gruppa H ha Valenica battì Gent cun 2:1. Malgrà ch’ils Spagnols han dominà il gieu è la decisiun crudada pir en la 72avla minuta grazia ad in autogol da Mitrovic.
En l’auter gieu da questa gruppa ha Zenit St. Petersburg gudagnà encunter Olympique Lyon cun 3:1. L’emprim gol han ils Russ gia sajettà en la segunda minuta. Cun 9 puncts ord trais gieus resta St. Petersburg cler a la testa, trais puncts avant Valencia.
RR novitads 06.00