Sonda è a Lake Louise en il Canada l'emprima cursa rapida dals umens da la nova stagiun da la cuppa mundiala da skis. En l'emprim trenament è Beat Feuz stà il pli spert svizzer. El è vegnì 8avel cun in retard da 85 tschientavels sin l'emprim, il Talian Christof Innerhofer. Patrick Küng è vegni 10avel, Mauro Caviezel 12avel. Carlo Janka ha pers bunamain duas secundas ed è vegnì 40avel.
Greva cupitgada dal Canadais Osborne-Paradis
Main alegraivel ha la stagiun da Manuel Osborne-Paradis cumenzà. Il Canadais da 34 onns è cupitgà ed è vegnì transportà en l'ospital cun in helicopter. Tge blessuras ch'el ha n'è anc betg enconuschent.
La cursa rapida ha lieu sonda proxima a las 20:10 (temp svizzer). La dumengia suonda lura a Lake Louise il Super-G dals umens.
RR novitads 06:00