Beat Feuz ha dà in cler signal en il segund trenament per l'emprima cursa rapida da la stagiun a Lake Louise. Il skiunz svizzer è stà passa ina segunda pli spert che ses concurrents - il Talian Dominik Paris e l'Austriac Johannes Kröll.
Era auters svizzers han mussà buns trenaments. Nils Hintermann è stà il quart spert. Carlo Janka è suandà sin plazza 6 e Patrick Küng sin plazza 13. La cursa en il Canada è sonda saira da temp svizzer.
Goodbye Erik
Il Canadais Erik Guay ha annunzià a Lake Louise surprendentamain la fin da sia carriera. Il campiun mundial da Super-G aveva oriundamain anc planisà dad ir questa stagiun per la davosa giada activamain cursas. Uss è l'atlet da 37 onns dentant sa decidì auter e di gia uss «goodbye» al circus da ski alpin – quai senza ir las cursas da chasa en il Canada. Influenzà sia decisiun hajan tranter auter er ils accidents da ses dus collegas da team Manuel Obsorne-Paradis e Broderick Thompson. El n'ha saja betg pli uschè pront da prender tant risico, ha declerà Guay.
Erik Guay è stà ina giada campiun mundial da Super-G (San Murezzan, 2017) ed ina giada campiun mundial en la cursa rapida (Garmisch, 2011). Plinavant ha el gudagnà tschintg cursas da la cuppa mundiala e la stagiun 2009/2010 la culla da cristal en la disciplina da Super-G.
RR novitads 06:00