Il nov scheftrenader da las skiunzas svizras, Beat Tschuor aveva gia enfin qua ina funcziun impurtanta tar Swiss-Ski. Sco schef dals juniors è Tschuor stà quel ch'ha gì da promover la nova generaziun da skiunzas e skiunzs. El ha fatg quai cun success. Il meglier exempel èn ils campiunadis mundials dals juniors ch'èn stads il schaner a Tavau. Là è la Svizra stada cun distanza la meglra naziun.
En il cas optimal po Tschuor ussa racoltar en la cuppa mundiala ils fritgs da sia lavur cun las junioras ed ils juniors. Lezs pon da lur vart profitar da l'enorma experientscha da Hans Flatscher che surpiglia il post da Tschuor tar ils juniors.
Hans Flatscher ha bajegià si in'equipa fitg ferma. Da surpigliar ina tala basa porscha fitg bellas perspectivas, munta dentant er gronda responsabladad. Jau fidel mamez dad esser abel da far questa lavur e surpigl gugent questa nova sfida.
Tschuor porta blera experientscha en il ski alpin
Avant sia lavur per ils juniors è Tschuor stà schef da scolaziun per ils scolasts da skis grischuns, scheftrenader en il Principadi da Liechtenstein, trenader da gruppa svizzer sin il livel da cuppa d'Europa e mundiala tar ils umens sco era tar las dunnas.
Plinavant ha el rimnà impurtantas experientschas ordaifer la lavur da trenader, quai sco mainafatschenta d'ina scola da skis ed aissa e sco manader dal sport da cursa en la vendita e l'industria da skis.
Il directur da la sparta ski alpin Stephane Cattin di plinavant che Tschuor haja fatg scolaziuns fundadas da trenader e sco manager da sport. En pli haja el er fitg bunas cumpetenzas da manar e communitgar, qualitads ch'el dovria en sia lavur futura sco scheftrenader.
RR novitads 11:00