Siglir tar il cuntegn

Naziunal/Internaziunal Behrami en in club da legendas

Il giugader d’amez Valon Behrami è per la quarta giada da la partida a campiunadis mundials.

Valon Behrami.
Legenda: Valon Behrami è per la quarta giada a campiunadis mundials. Keystone

Behrami ha gia giugà il 2006 en Germania, il 2010 en l’Africa dal Sid ed il 2014 en la Brasilia. Cunquai è il Tessinais l’emprim svizzer cun quatter campiunadis mundials en ses palmarès ed uschia er ina part d’in club da legendas. Quatter campiunadis mundials han tranter auter er giugà Pele, Diego Maradona, Ronaldo, Oliver Kahn u Thierry Henry.

Malgrà ch’ils campiunadis mundials en Russia èn ses davos da la carriera, è Valon Behrami anc adina ina figura centrala en la naziunala svizra, in giugader clav. Cun sia experientscha e ses ferm caracter gioga il giugader da 33 onns dentant er in’impurtanta rolla sper la plazza da ballape.

Ferm caracter ed adina positiv

Durant tut quels 16 onns che Valon Behrami è gia profi n’è dentant betg tut ì adina sco giavischà. Als campiunadis mundials dal 2010 en l’Africa dal Sid ha Behrami per exempel survegnì la carta cotschna gia en il segund gieu da gruppa cunter il Chile, uschia ch’il turnier è stà a fin per el strusch che quel aveva cumenzà. Plinavant è Behrami er adina puspè vegnì franà da blessuras. Ma il cumbattant da l’equipa è er adina puspè stà sin pes.

A ses davos campiunadis mundials vul Valon Behrami anc ina giada cumbatter fin la davosa secunda, per uschia er dumagnar la finamira svizra, ils quart-finals. Quai fiss il punct sin l’i en sia lunga carriera en il tricot da la naziunala svizra.

RR actualitad 17:00