Siglir tar il cuntegn

Header

Stadion da ballape a Brüssel.
Legenda: In termin da spustada dal gieu amicabel cunter la Spagna n'è anc betg vegnì numnà. Keystone
cuntegn

Naziunal/Internaziunal Belgia sposta gieu amicabel pervi da resalvas da segirezza

En vista a la situaziun da segirezza tendida suenter las attatgas da Paris ha la Belgia auzà il stgalim d'avertiment da terror. En consequenza vegn spustà il gieu da ballape amicabel tranter la Belgia e la Spagna.

Per l'entir pajais valia il stgalim 3 da pussaivel 4, han las autoritads da la Belgia communitgà la notg a Brüssel. Stgalim 3 da 4 munta ch'ina attatga è pussaivla u probabla. Periclitads sajan cunzunt lieus nua che blera glieud sa raduna, ha declerà il center da crisa che tutga tar il ministeri da l’intern.

Frantscha ed Engaleterra dattan la partida

Didier Deschamps, il trenader da la squadra naziunala franzosa.
Legenda: Didier Deschamps, il trenader da la squadra naziunala franzosa. Keystone

La partida tranter la Frantscha e l'Engalterra a Londra perencunter vegn dada. Il trenader franzos Didier Deschamps ha annunzià, ch'i saja fitg impurtant da dar quest gieu.

Nus lain mussar che nus essan loschs dad esser Franzos.
Autur: Didier Deschampstrenader da la naziunala franzosa

Ils ballapedists veglian demonstrar ch'els sajan loschs d'esser Franzos. «Nus essan qua per represchentar noss pajais, nossas colurs», ha ditg Deschamps. Ils ultims dis saja la squadra naziunala franzosa stada en malencurada. Pertutgà persunalmain da las attatgas dal venderdi è il giugader Lassana Diarra ch'ha pers sia cusrina tar l'attatga en la halla da concert «Bataclan».

La partida tranter la Svizra e l'Austria vegn medemamain dada questa saira a Vienna, quai sut mesiras da segirezza augmentadas, communitgeschan ils responsabels.

RR novitads 06:00