Siglir tar il cuntegn

Header

cuntegn

Naziunal/Internaziunal Bencic gudogna cunter Venus Williams a l'Australian Open

Belinda Bencic ha eliminà la finalista da l'onn passà Venus Williams al Australian Open. Uschia stat ella en la segunda runda dal Grand Slam.

La giugadra da tennis Svizra ha procurà per ina surpraisa. La giuvna da 20 onns ha battì il numer tschintg dal mund en dus sets cun 6:3 e 7:5. Venus Williams è uschia crudada ora en l'emprima runda.

Surpraisa era per Bencic sezza

Cura che Bencic ha gudagnà sia emprima balla da matsch suenter bun duas uras ha ella tegnì ses mauns sur il chau. Tut surpraisa è ella sa manada vers la boxa. Suenter in'operaziun vid la chanvella il settember passà n'havess ella betg cartì da pudair sa participar al Grand Slam en l'Australia. Pli gronda era la surpraisa da gudagnar cunter il numer tschintg dal mund.

Igl è l'emprima victoria da Belinda Bencic cunter ina giugadra da Tennis da las top-ten dapi bun dus onns. En la segunda runda tutgà Bencic sin la victura da la partida tranter la Tailandaisa Luksika Kumkhum (WTA 125) e la Svedaisa Johanna Larsson (WTA 80).

Viktorija Golubic perda

Per la giugadra da tennis svizra Victoria Golubi è l'Australian Open a fin suenter l'emprima runda. La Turitgaisa ha pers la partida encunter l'Ucranaisa Kateryna Bondarenko en trais sets cun 7:6 (7:3), 4:6, 6:2.

RR novitads 06:00+

Artitgels legids il pli savens