Siglir tar il cuntegn
Inhalt

Naziunal/Internaziunal Berna beneventa il Tour de France

Durant trais dis beneventa la chapitala svizra la pli gronda cursa da velo dal mund. La 16avla etappa dal Tour de France 2016 maina da Moirans-en-Montagne a Berna. Suenter in di da paus en la chapitala partan ils bun 200 ciclists la mesemna da Berna direcziun Finhaut-Emosson en il chantun Vallais.

Ciclists al Tour de France
Legenda: Il Tour de France è in dals gronds spectaculs da sport dal mund. Keystone

En l’istorgia da 103 onns Tour de France ha questa cursa gia manà 24 giadas sur ils cunfins da la Svizra.

E tuttina datti quest onn ina premiera: Igl è numnadamain l’emprima giada ch’il Tour vegn en la chapitala svizra. Berna dastga sa preschentar durant bun trais dis al mund da sport, in grond mund – bun 12 milliuns aspectaturas ed aspectaturs en 190 pajais persequiteschan di per il Tour de France via televisiun. Betg cumprendis èn ils tschients millis fans mintgamai a l'ur da la via.

Sfida per Berna

Per la citad da Berna èsi in’organisaziun gigantica. Il Tour de France è ina cursa da tut in’autra dimensiun ch’il Tour de Suisse. Ils ciclists vegnan accumpagnads da passa 2’500 autos accreditads cun bun 4’000 persunas, da quai circa 2’000 schurnalists.

Gronds custs per segirtad

Il spectacul dal Tour de Fance a Berna procura er per gronds custs. Sulet la citad da Berna prenda ord cassa in mez milliun francs per questa concurrenza. Plinavant sustegn chantun da Berna quest eveniment cun 1,7 milliuns francs. Bler dals daners vegn duvrà per la segirtad. Quella ha quest onn dapertut prioritad suenter ils attentats en la Frantscha. Che tut grategia sco giavischà e senza incaps, da quai fan attenziun la polizia, la protecziun civila, schuldada ed era blers voluntaris.

Fabian Cancellara al Tour de France 2016.
Legenda: Fabian Cancellara vul far furori tar sia etappa da chasa al Tour de France 2016. Keystone

Cancellara a chasa

La festa da velo a Berna è dentant garantida. Il Tour de France vala suenter gieus olimpics e campiunadis mundials da ballape e rugby sco il pli grond eveniment da sport dal mund. Encurunar la festa en la chapitala svizra pudess il matadur local Fabian Cancellara cun ina victoria quasi avant ses isch-chasa, quai en ses davos Tour de France e sia davosa stagiun sco profi.

Plan etappas svizras al Tour de France 2016.
Legenda: Plan etappas svizras al Tour de France 2016. Keystone

209 km – paus – 184,5 km

La 16avla etappa dal Tour de France maina il glindesdi da Moirans-en-Montagne, in lieu franzos en la vischinanza da Genevra, a Berna, quai sur 209 kilometers. Il mardi è il segund di da paus per ils ciclists dal Tour de France 2016. La mesemna enturn mezdi partan ils ciclists da Berna visavi il Stade de Suisse en direcziun Finhaut-Emosson en il Vallais. Questa emprima etappa en las Alps è 184,5 kilometers lunga.

RR actualitad 08:00