Siglir tar il cuntegn
cuntegn

Naziunal/Internaziunal Berna en il final e Tavau sto gudagnar

Berna ha gudagnà il mezfinal cunter Lugano e Zug è en avantatg cunter Tavau.

2 giugaders da hockey en in duell.
Legenda: Ils giugaders n’èn sa regalads nagut en la partida tranter l’SC Berna e Lugano. Keystone

Il campiun actual po defender ses titel. L'SC Berna gudogna er la tschintgavla partida dal mezfinal encunter Lugano ed è uschia en il final. Berna ha gudagnà il gieu cun 4:3 e la seria da best of seven cun 4:1. Ditg ha Berna però stuì spetgar sin la victoria. La decisiun è pir crudada en la lutga da penaltis. E qua han ils giugaders da Berna mussà ina meglra prestaziun. Gest dus han tuc il gol e procurà che Berna è en il final. Per Lugano, il finalist da la stagiun passada è la stagiun a fin. En il final spetga Berna uss sin il victur da la seria tranter Zug e Tavau.

Emprima balla da matsch per l'EV Zug

Zug ha era gudagnà la tschintgavla partida da la seria da mezfinal encunter il club da hockey da Tavau e maina uss la seria da best of seven cun 3:2. Zug ha gudogna il duel encunter Tavau cun 4:3 e dovra uss mo pli ina victoria per far il pass en il final. Era la tschintgavla partida dal mezfinal era fitg stretga. Suenter dus terz e quaranta minutas stevi 3:2. En il davos terz ha Zug lura l'emprim anc augmentà sin 4:2. Tavau è dentant anc ina giada stà bun da scursanir la partida. Per dapli ch'il 4:3 n’hai però betg pli tanschì a l’equipa grischuna.

Uschia sto il HCD gudagnar la proxima partida, cas cuntrari è la stagiun per Tavau a fin. Il proxim gieu è sonda saira l'emprim d’avrigl a Tavau.

Friburg-Gottéron è salvà en liga naziunala A

En il final da playout tranter Friburg-Gottéron ed Ambri Piotta ha Friburg festivà la quarta victoria e sa salva uschia en la liga naziunala A. Friburg ha gudagnà la tschintgavla partida da la seria cun 5:2 encunter Ambri e decida la seria da best of seven la fin finala cleramain cun 4:1 victorias. Friburg resta er la proxima stagiun en la liga naziunala A.

Per la davosa plazza en la liga naziunala A ha Ambri da cumbatter encunter il campiun da la liga naziunala B. En dumonda vegnan Langenthal u lura ils Rapperswil-Jona Lakers. En la seria da final da la liga naziunala B statti suenter quatter partidas pari 2:2.

RR novitads 23:00