Ils burgais da Calgary èn cunter ina candidatura da la citad canadaisa per ils gieus olimpics d'enviern 2026. Sin il servetsch da novitads curtas Twitter ha publitgà la citad da Calgary, che tenor emprims resultads inuffizials sajan s’exprimidas 132’832 (43.6%) persunas per ina candidatura e 171’750 (56.4%) encunter.
«Nus respectain il process democratic»
Il cumitè ch’era s’engaschà per la candidatura da Calgary saja bain dischillusiunà, respectia dentant il process democratic, annunzian els en sin lur conto da Twitter en la rait:
Nus essan persvadids che #Calgary2026 era la meglra occasiun per unir nossa communitad enturn ina nova visiun da speranza e lecziuns preziusas che nus avain emprendì per l’avegnir.
A Calgary eran stads ils gieus olimpics d'enviern 1988. Che be cun las bellas memorias da quella giada na saja quai betg fatg, avevan argumentà ils adversaris da la candidatura, qua giaja per cifras, fatgs e datas. Il NA permettia uss da lavurar ensemen vi dad «in avegnir ferm e dinamic» per Calgary:
Da la medema tematica aveva decis il suveran grischun gia ils 12 da favrer 2017. Er las Grischunas ed ils Grischuns na vulevan savair nagut dad ina candidatura: Els avevan ditg NA ad in credit d’impegn da 25 milliuns francs per finanziar la candidatura grischuna per ils gieus olimpics.
Schizunt ils Vallesans, che vulevan trais giadas sustegnair gieus olimpics en lur chantun, avevan ditg da NA tar gieus olimpics 2026: Il suveran ha decis en il zercladur 2018 cun 54% cunter in sustegn chantunal da 100 milliuns a gieus olimpics.
Cun il NA da Calgary incassa il Comité olimpic internaziunal IOC uschia puspè ina sconfitta en ina votaziun publica. En la cursa per ils gieus olimpics 2026 èn actualmain be pli Milaun/Cortina d'Ampezzo e Stockholm.
L'IOC surdat ils gieus il 2019.
RR novitads 06:00
