Bettina Bieler sin il «dragon boat»

Ella ha vivì durant otg onns a Hongkong, fundà ensemen cun ina collega in label per moda da chalzers e dasperas pratitgescha ella in sport tut spezial. Bettina Bieler (39) ch’è creschida si a Rabius è commembra da l’equipa naziunala da bartgas da draguns.

Laschar ir video «Bartgas da draguns - duas Sursilvanas tranter l’elita»

Bartgas da draguns - duas Sursilvanas tranter l’elita

3:14 min, Telesguard dals 14.9.2017

Suenter la matura a Mustér, il studi a l’Universitad da Turitg, scienza da communicaziun ed economia da manaschi, ha Bettina Bieler bandunà il 2004 sia patria ed è ida a Hongkong, ina metropola en il sid da la China. Malgrà ch’ella è puspè turnada avant intgins enavos en Svizra e viva oz ensemen cun ses um a Wädenswil a l’ur dal lai da Turitg resta Hongkong ses segund da chasa.

A Hongkong ha Bettina Bieler survegnì il plaschair vid il sport cun bartgas da draguns, in sport ch’ella enconuscheva dentant gia avant. En la China è il sport cun bartgas da draguns fitg popular, pajabels per mintgin e bainvesì tar il public. Impurtantas concurrenzas vegnan perquai er mussadas direct a la televisiun.

In hobi sin aut livel

Cumenzà ha Bettina Bieler a Hongkong cun quest sport. Dapi ch’ella è puspè en Svizra trenescha ella cun il club dad Eglisau. Dapi in temp è Bieler era commembra da l’equipa naziunala Svizra che sa participescha l’october als campiunadis mundials da bartgas da draguns en China, pia en la patria da quest sport. Malgrà ch’ils megliers svizzers fan quest sport sper la lavur èn ils trenaments fitg intensivs. I dovra forza, ina buna fitness, ina buna tecnica ed impurtant saja oravant tut da la finala avair in bun ritmus ed ina buna dinamica sin la bartga di Bettina Bieler.

I dat differentas bartgas, pli grondas e pli pitschnas, e sin mintgina è er in tambur che dat en il ritmus ed in manader che dirigia e maina la bartga. Las bartgas sezzas èn tradiziunalmain da lain cun davant in chau d’in dragun e davos ina cua d’ina dragun. A las concurrenzas internaziunalas vegn ozendi dentant cumbattì cun bartgas modernas da carbon.

Er ina part rumantscha sin la bartga svizra

Dapi la fin dal 2016 sa prepara l’equipa naziunala sin quest punct culminant, ils campiunadis mundials en China. Er sche la concurrenza è fitg gronda, oravant tut ord la China e conturn, è Bettina Bieler da buna speranza che la Svizra po concurrenzar e sa maschadar tranter las meglras equipas. Als davos campiunadis mundials il 2015 en il Canada è la naziunala Svizra schizunt turnada a chasa cun duas medaglias da bronz. Medaglias hai er dà als davos campiunadis d’Europa.

Sin la bartga svizra regia er ina gronda part Rumantschia. Sper Bettina Bieler è numnadamain er Adriana Monn da Sedrun commembra da l’equipa naziunala. Ed ellas discurrian er adina rumantsch ensemen sin la bartga, tradescha Bettina Bieler.