Siglir tar il cuntegn

Header

cuntegn

Biatlon ad Oberhof Selina Gasparin l'emprima giada questa stagiun en ils top 20

Malgrà trais sajets ch'èn ids dasperas ha l'Engiadinaisa pudì far en il sprint da 7,5 kilometers il 18avel plaz. Ella ha pers cnap duas minutas sin la victura Marte Olsbu Röiseland da la Norvegia. Suenter lezza èn suandadas la Tudestga Denise Herrmann e la Franzosa Julia Simon.

Selina Gasparin durant sajettar.
Legenda: La tschajera ha fatg problems durant sajettar. Keystone

L'excursiun da Selina Gasparin tar las passlunghistas a Lai durant la pausa da Nadal, para d'avair fatg bain ad ella. Sin la loipa da Oberhof è la victura d'argient da Sotschi il 2014 stada svelta. Durant questa stagiun ha ella gia fatg in 22avel plaz ad Östersund. Direct suenter il return, suenter la naschientscha da ses segund uffant, è ella stada durant il campiunadi mundial dal favrer passà duas giadas en ils top 15.

Er las ulteriuras Svizras han gì lur problems cun la tschajera durant il sajettar. Elisa Gasparin è vegnida 40avla ed ha cun dus sbagls da sajettar anc pudì far in punct da la cuppa mundiala. Lena Häcki (51avla) ed Aita Gasparin (67avla) han manchentà ils puncts cun mintgamai quatter sbagls.

audio
Per tadlar: Las novitads da las 18:00
ord Novitads dals 09.01.2020. Maletg: RTR
laschar ir. Durada: 3 minutas 52 Secundas.

RTR novitads 18:00

Artitgels legids il pli savens