Siglir tar il cuntegn

Header

cuntegn

Biatlon Il Brasilian sin ils skis da passlung

«Servus, jau sun il Brazo ed jau na sun betg ballapedist, mabain in passlunghist e biatlet». Uschia è il giuven brasilian Matheus De Santana Vasconcellos sa preschentà als campiunadis mundials da biatlon dals juniors a Lai.

S’inamurà en il sport d’enviern è Matheus De Santana cura ch’el è vegnì cun 10 onns l’emprima giada en l’Austria. Dapi lura viva el là ensemen cun ses geniturs. Malgrà ch’el laschia magari encrescher per la cultura brasiliana na pudess el betg pli metter avant da bandunar l’Austria. Brazo sco el vegn numnà, frequenta il mument il davos onn d’emprendissadi sco constructur en il center da scolaziun nordic ad Eisenerz en la Steiermark. Là po el metter sport e professiun sut il medem tetg.

Da la musica instrumentala fin il Kaiserschmarrn

Matheus De Santana Vasconcellos è in grond fan dal ballape, oravant tut cura che la Brasilia cumbatta per titels e trofeas. Uschiglio saja el dentant propi mez Austriac. El ha pli gugent ils culms ch’il sablun da la Copacabana a Rio de Janeiro nua ch’el è naschì e creschì si, pli gugent chalzers da skis che flip flops e schizunt pli gugent la musica instrumentala che samba. Uschia suna Matheus De Santana er sez trumbetta. E quai che pertutgia la cuschina austriaca, quella saja simplamain grondiusa di Brazo.

Matheus De Santana Vasconcellos
Legenda: Il passlung è ina da las grondas passiuns da Matheus De Santana Vasconcellos. mad

Brazo siemia da Peking 2022

Ils sports d’enviern ha el empruvà ora quasi tuts, davent da snowboard, ski alpin enfin siglir cun skis. Il pli grond plaschair haja el dentant dal passlung e dal biatlon. E sco campiun sidamerican en il sprint da passlung ha Matheus De Santana er dastgà ir a la partenza als davos campiunadis mundials da ski nordic avant in onn a Seefeld, quasi avant ses isch-chasa. Ils campiunadis mundials da biatlon dals juniors a Lai èn stads in ulteriur punct culminant en sia anc giuvna carriera. Matheus De Santana Vasconcellos vul dentant dapli, el siemia da dastgar represchentar las colurs da la Brasilia als proxims gieus olimpics d’enviern il 2022 a Peking, quai en il biatlon.

RTR Sportissimo 17:00

Artitgels legids il pli savens

Scrollar a sanestra Scrollar a dretga