Bode Miller metta d’ina vart ils skis da cursa

La carriera dal skiunz american Bode Miller è definitiv a fin. En ina intervista ha l’um da 40 onns declerà, ch'el na vegnia mai pli a far ina cursa da la cuppa mundiala.

Il skiunz american Bode Miller Bild in Lightbox öffnen.

Legenda da maletgs: Il skiunz american Bode Miller il cumenzament dal 2017 a chaschun d'ina conferenza da medias. Keystone

La davosa cursa da la cuppa mundiala ha Bode Miller fatg avant bunamain quatter onns. Ed uss ha el annunzià en in discurs en las medias socialas, ch’el saja stà avunda sin ils skis. El n’haja nagin tschaffen pli sin cursas da skis. Anc l'entschatta da l'onn aveva Miller ditg, ch'el vegnia eventualmain a turnar en la cuppa mundiala.

Bleras arbajas

Il 2005 ed il 2008 aveva Bode Miller gudagnà il classament general da la cuppa mundiala. Campiun olimpic è el daventà il 2010 a Vancouver en la super-cumbinaziun. Vitiers vegnan tschintg ulteriuras medaglias olimpicas, e quatter titels da campiun mundial en quatter differentas disciplinas. Il 2003 a San Murezzan è Bode Miller daventà campiun mundial dal slalom gigant e da la cumbinaziun.

La davosa cursa ha Bode Miller fatg il favrer 2015 a Beaver Creek, tar il campiunadi mundial. En la cursa dal super-g era el crudà malamain e sa taglià.

RR novitads 14:00