Siglir tar il cuntegn
Inhalt

Naziunal/Internaziunal Brambilla va per Maglia rosa

Al Giro d'Italia ha l'otgavla etappa purtà ina midada a la testa dal classament general. L'emprim fin ussa, l'Ollandais Tom Dumoulin, n'ha betg pli pudì tegnair il tempo en l'ultima ascensiun ad Arezzo en la Toscana.

In victur traglischant: Gianluca Brambilla.
Legenda: In victur traglischant: Gianluca Brambilla. SRF

Gudagnà l'etappa ha il Talian Gianluca Brambilla che ha uschia era gist surpiglià il Maglia rosa, l'emprim plaz dal classament general.

L’um da 28 onns da la Lumbardia po uschia festivar ses pli grond success. El era partì en l’etappa sco 22avel dal classament general. Perquai ch’el è dentant sa distanzià da la gruppa da favurits per 1:41 minutas, dastga el uss purtar rosa. Dumoulin ha finì la cursa cun in retard da trais minutas sin Brambilla.

En il classament general ha Brambilla uss in avantatg da 23 secundas sin il Russ Ilnur Sakarin. Lez aveva gudagnà il Tour de Romandie l’onn passà. Sco terz suonda l’Ollandais Steven Kruijswijk cun in retard da 33 secundas. Las plazzas 4 e 5 van als Spagnol Alejandro Valverde resp. Al Talian Vincenzo Nibali.

RR novitads 18:00 / RR Sportissimo 17:00