Siglir tar il cuntegn
cuntegn

Naziunal/Internaziunal Brasilia batta la Costa Rica

En il temp supplementar ha la Brasilia anc pudì evitar in segund remis en ses segund gieu dal campiunadi mundial. Ed en il segund gieu dal venderdi batta la Nigeria l'Islanda cun 2:0.

In giugader da la Brasilia ed in da Costa Rica cun ina balla.
Legenda: Brasilia cunter la Costa Rica. Keystone

La Brasilia batta Costa Rica cun 2:0. En il segund gieu da gruppa al campiunadi mundial da ballape ha il grond favurit realisà si'emprima victoria. Ils gols per il quintupel campiun mundial han sajettà Coutinho en la 91avla minuta e Neymar en la 97avla minuta.

Suenter 180 minutas ha la Brasilia uschia quatter puncts e trais gols sin il conto. Dus dals trais gols ha tratg il giugader dal FC Barcelona Philippe Coutinho.

Nigeria gudogna cun 2:0 cunter l'Islanda

Al campiunadi mundial da ballape en la Russia ha la Nigeria gudagnà cunter l'Islanda cun 2:0. Per omadus gols ha il giugadur dal ZSKA Moskau Ahmed Musa procurà. La Nigeria è stada la meglra equipa – ils islandais han dentant manchentà pliras schanzas da tutgar il gol, uschia ha Sigurdsson sajettà sperasvi in penalti en la 83avla minuta.

En l'ultim gieu da gruppa dovra l'Islanda uschia ina victoria cunter la Croazia per sa qualifitgar per ils otgavels finals. A la Nigeria tanscha in pari cunter l'Argentina per vegnir vinavant. En la medema gruppa sco las duas equipas ha la Croazia gia sa qualifitgà la gievgia saira cun ina victoria encunter l'argentina per l'otgavelfinal.

Scena da giug.
Legenda: Ferma prestaziun da la Nigeria. Keystone

RR novitads 16:00 / 20:00