Siglir tar il cuntegn

Header

audio
Mezdi: Brida Castelberg – passlunghista rumantscha als National Winter Games
Or da Actualitad dals 23.01.2020.
laschar ir. Durada: 03:20 minutas.
cuntegn

Brida Castelberg «Ina giada in'autra loipa che quella tranter Trun e Mustér»

Brida Castelberg da Rabius è ina da las radund 600 persunas che prendan part als National Winter Games a Villars en il chantun Vad. Igl èn ils gieus per persunas cun in impediment spiertal.

Brida Castelberg ha dapi sia naschientscha in impediment vid la vesida. A dretg ora na vesa la giuvna da Rabius nagut, mo sin las varts. Perquai è l'Argo a Glion il dachasa dad ella durant l'emna. Quai n' impedescha dentant betg ella da sa deditgar a ses grond hobi il passlung. Quasi mintga fin d'emna da bell'aura fa Brida Castelberg passlung. Quai oravant tut sin la loipa tranter Trun e Mustér.

National Winter Games - in event tut spezial per ella

Ils National Winter Games èn ina occurrenza nua che persunas cun in impediment spiertal pon sa participar. Dals 23 fin ils 26 da schaner èn radund 600 persunas da la partida en differentas discplinas a Villars. Per la giuvna da Rabius èsi ina gronda onur dad esser ina da las participantas.

Jau sun schon in zic gnervusa. Igl è da patratgar positiv epi vegni bun.
Autur: Brida Castelbergpasslunghista da hobi

Brida Castelberg na sa legra dentant betg mo sin las cursas da passlung che spetgan sin ella, mabain era sin il program da rama. La giuvna sa legra er da prender d'enconuscher novas persunas. E plinavant er da vesair ina giada in'autra loipa che quella tranter Trun e Mustér.

RTR actualitad 11:00