Siglir tar il cuntegn

Naziunal/Internaziunal Bronz per Kariem Hussein e per Mujinga Kambundji

Omadus atlets arrivan sin plazza 3, Kariem Hussein sur 400 meters obstachels e Mujinga Kambundji sur 100 meters. Entant che Hussein manchenta da defender ses titel d'avant dus onns, procura Kambundji per l'emprima medaglia da sprint per la Svizra tar in campiunadi europeic dapi il 1978.

Mujinga Kambundji, dretg la Franzosa Floriane Gnafoua.
Legenda: Mujinga Kambundji sa bitta sur la lingia, dretg la Franzosa Floriane Gnafoua. Keystone

Mujinga Kambundji è dus tschientavels pli sperta che la Brita Asha Philip e daventa uschia terza. Lunsch ora la sperta sur ils 100 meters è dentant stada l'Ollandaisa Dafne Schippers, ella curra 35 tschientavels pli spert che Kambundji. La segunda la Bulgara Ivet Lalova-Collio è stada sulettamain tschintg tschientavels pli sperta che la Svizra.

Kariem Hussein sursiglia in obstachel.
Legenda: Kariem Hussein sursiglia in obstachel durant sia cursa da bronz. Keystone

Hussein perda ses titel

Sur ils 400 meters obstachels sto Kariem Hussein laschar passar d'ina vart il Tirc Yasmani Copello Escobar, quel daventa campiun europeic cun in avantatg da 12 tschientavels sin il Svizzer. Ed era anc per 4 tschientavels pli spert è stà il Spagnol Sergio Fernandez.

Suenter la cursa ha Kariem Hussein ditg ch'el saja stà in zic dischillus l'emprim mument. Dentant el haja gea ina medaglia. Avant dus onns era Hussein anc daventà campiun sur questa distanza.

Wilson senza schanza sur 200 meters

En il final sur 200 meters daventa il Svizzer Alex Wilson setavel e davos. En la curva era el anc tranter ils megliers, lura ha la forza dentant mancà per trair atras la cursa. Victur è daventà il Spagnol Bruno Hortelano, damai ch'il Ollandais Churandy Maria è vegnì disqualifitgà perquai ch'el ha passà en in vial vischinant.

RR novitads 20:00/22:00