Siglir tar il cuntegn

Header

cuntegn

Naziunal/Internaziunal Bronz per la Grischuna Stephanie Jenal al CM dals juniors

Plinavant ha Marco Odermatt gudagnà sia quarta medaglia d'aur al Campiunadi mundial dals juniors da Tavau.

La skiunza da Samignun vegn terza en il Super-G e gudogna bronz. La Grischuna perda 0,63 secundas sin la campiunessa mundiala Kajsa Lie da la Norvegia. La medaglia d'argient va a Franziska Gritsch da l'Austria. Bleras skiunzas n'èn betg vegnidas fin en l'arrivada da quest Super-G mundial da las junioras. Da las 6 Svizras a la partenza èn gist 4 crudadas ora. Tranter ellas è er Aline Danioth dal chantun Uri ch'ha gudagnà mesemna la medaglia da bronz en il slalom.

En la cuppa d'Europa ha Stephanie Jenal fin uss fatg 28 cursas. Ses meglier plaz è stà in 14avel. En la cuppa mundiala è la skiunza dal cader C da Swiss Ski anc mai stada en acziun.

4 medaglias d'aur per Odermatt al CM dals juniors

Marco Odermatt è quatter-dubel campiun mundial. Al campiunadi mundial dals juniors a Tavau gudogna Odermatt era la cumbinaziun. Suenter il slalom era il skiunz da la Sutsilvania anc 6avel. En il super-g da quella cumbinaziun ha Odermatt declassà la concurrenza e gudogna aur avant ses cumpatriot Semyel Bissig.

La medaglia da bronz va a l'Austriac Raphael Haaser. Ils ultims dis è il junior Marco Odermatt vegnì campiun mundial en la cursa rapida, il super-g ed en l'event da team. Uschia ha la Svizra uss gudagnà 8 medaglias a quest campiunadi mundial da skis dals juniors.

RR novitads 14:00

Artitgels legids il pli savens