Siglir tar il cuntegn
Inhalt

Naziunal/Internaziunal Bunas cartas per la Svizra

Sin la naziunala Svizra spetga questa saira in dals pli impurtants gieus da ballape insumma. Na perdan ils Svizzers betg encunter ils Irlandais dal Nord po la Svizra sa participar l’onn proxim per la quarta giada en seria per ils campiunadis mundials da ballape, il proxim en Russia.

Equipa naziunala durant il trenament
Legenda: En il St. Jakob Park a Basilea vegn l'equipa naziunala sustegnida da passa 35'000 fans. Keystone

Il 1:0 saja in malsegir resultat avant quest gieu chapital en il St. Jakob-Park a Basilea, manegia il reschissur d’amez Granit Xhaka. Il giugader dad Arsenal ha sa chapescha raschun, dentant tuttina tschantscha tut per la Svizra. Dad in maun tanscha in pari per sa qualifitgar per ils campiunadis mundials, da l’auter maun ha la Svizra dapli classa ch’ils Irlandais dal Nord e vala uschia sco il grond favurit. Plinavant dastgan ils Svizzers giugar quest segund gieu da barrage avant ils fans da chasa a Basilea.

Concentrà – disciplinà – focusà

Il trenader naziunal Vladimir Petkovic pretenda anc ina giada concentraziun cumplaina per quest davos duel cun ils Irlandais dal Nord. Decisiv saja il mental, uschia Petkovic. Quai ch’ins haja vis durant bun 60-70 minutas en l’emprim gieu da barrage a Belfast, quai veglia el vesair questa saira durant 90 minutas, numnadamain in’equipa che controlleschia e dirigia il gieu. Durant che Petkovic giavischa che sia equipa sajetta il 1:0 gia baud per uschia far tut cler avertescha il capitani Stephan Lichtsteiner d’oravant tut esser fitg ferm defensiv. Pertge ils Irlandais dal Nord vegnan a giugar offensiv e metter tut sin ina carta. Els n’han da perder nagut pli e ston sajettar gols en il St. Jakob-Park per anc realisar il siemi dals campiunadis mundials.

Suenter che Fabian Frei ha bandunà l’equipa pervia d’in mortori en famiglia èsi da quintar che Vladimir Petkovic cumenza cun la medema squadra sco gia avant trais dis a Belfast.

Il segund gieu da barrage Svizra – Irlanda dal Nord cumenza las 18:00 uras. A partir da las 17:06 uras rapporta il Radio Rumantsch live da la decisiun en vista als campiunadis mundials 2018 en Russia.

RR Sportissimo 12:00