Siglir tar il cuntegn

Header

cuntegn

Naziunal/Internaziunal Calanda Broncos salidan da la testa da la tabella

Ils Calanda Broncos han cumenzà cun success la stagiun d’American Football en Svizra. Suenter ils emprims tschintg gieus da campiunadi, la mesadad da la qualificaziun, èn ils Broncos a la testa da la tabella ed uschia sin buna via da cuntanscher il final, il Swiss Bowl 2015.

Ils Calanda Broncos han gudagnà quatter dals emprims tschintg gieus en questa stagiun. Sulet encunter ils Lions da Lucerna han ils Broncos pers, quai cun 42:50 suenter prolungaziun. Quai è stà ina da las sulettas terradas insumma ils davos onns. L’equipa grischuna ha dentant mussà ina reacziun sin questa terrada e battì la davosa fin d’emna ils Renegades da Turitg cun 48:42.

audio
Saira: Calanda Broncos salidan da la testa da la tabella
ord Actualitad dals 27.04.2015.
laschar ir. Durada: 1 minuta 57 Secundas.

Schanza da far revantscha

Sin ils Calanda Broncos spetga en las proximas duas rundas da campiunadi ina dira nusch. Ils Broncos fruntan durant il matg duas giadas sin ils Gladiators da Basilea, il defensur dal titel. Suenter ch’ils Broncos avevan gudagnà tranter il 2009 ed il 2013 gist tschintg giadas en seria il titel, han ils Grischuns pers l’onn passà il gieu decisiv, il Swiss Bowl encunter ils Gladiators. Il proxim mais survegnan ils Calanda Broncos pia gist duas giadas la schanza da far revantscha per quella terrada.

Artitgels legids il pli savens