La FIFA, l'uniun mundiala da ballape, ha tratg la sort per la qualificaziun per il campiunadi mundial da ballape 2022 a Katar. La Svizra gioga en la gruppa «C» e frunta sin:
- l'Italia,
- l'Irlanda dal Nord,
- la Bulgaria,
- la Lituania.
Il favurit da la gruppa è l'Italia. Cunter quella squadra ha la Svizra schon giugà 58 giadas – mo otg giadas han els gudagnà. Ils emprims gieus da qualificaziun per il campiunadi mundial cumenzan il mars da quest onn che vegn, ils davos vegnan il november.
Ils 10 victurs da mintga gruppa vegnan qualifitgads directamain per il campiunadi mundial. Las 10 squadras ch'èn sin plaz dus han la schanza da sa qualifitgar en ils playoffs.
Las gruppas da la qualificaziun
| Gruppa A: Portugal, Serbia, Irlanda, Luxemburg, Aserbaidschan | Gruppa B: Spagna, Svezia, Grecia, Georgia, Cosovo |
| Gruppa C: Italia, Svizra, Irlanda dal Nord, Bulgaria, Lituana | Gruppa D: Frantscha, Ucraina, Finlanda, Bosnia Erzegovina, Kasachstan |
| Gruppa E: Belgia, Valisa, Tschechia, Bieloruss, Estonia | Gruppa F: Danemarc, Austria, Scozia, Israel, Färöer, Moldavia |
| Gruppa G: Pajais Bass, Tirchia, Norvegia, Montenegro, Lettonia, Gibraltar | Gruppa H: Croazia, Slovachia, Russia, Slovenia, Cipra, Malta |
| Gruppa I: Engalterra, Pologna, Ungaria, Albania, Andorra, San Marino | Gruppa J: Germania, Rumania, Islanda, Macedonia dal Nord, Armenia, Liechtenstein |