Il comité executiv da la UEFA ha communitgà la midada ch'era gia vegnida spetgada. En conferenzas da video è la UEFA sa cussegliada cun las ligas naziunalas, l'uniun da clubs europeica sco era ils 55 commembers da la federaziun. Oriund avess il campiunadi europeic gì lieu dals 12 da zercladur fin ils 12 da fanadur. Uss ha il turnier lieu dals 11 da zercladur fin ils 11 da fanadur dal 2021. Anc resta avert sch'il campiunadi europeic po vegnir manà tras en la medema furma sco planisà quest onn.
Cun spustar il turnier han las federaziuns naziunalas la pussaivladad da finir lur stagiuns a moda regulara. Il di da referenza è lura ils 30 da zercladur, nua che contracts regulars fineschan normalmain.
L'emprim gieu è stà previs per ils 12 da zercladur a Roma. Dasper Roma èn er Amsterdam, Minca, Kopenhagen, Bilbao, St. Petersburg, Bukarest, Budapest, Baku, Glasgow, Dublin e Londra elegids sco lieus giastaders.