Campiunadi mundial d’atletica leva sin visita a Peking

Bun 2’000 atletas ed atlets da passa 200 naziuns cumbattan dals 22 fin ils 30 d’avust per medaglias al campiunadi mundial d’atletica leva a Peking. Quest campiunadi mundial en la metropola da 21 milliuns abitants è ina da las pli grondas concurrenzas da sport dal 2015.

Il stadion naziunal, il gnieu d’utschels, a Peking. Bild in Lightbox öffnen.

Legenda da maletgs: Il stadion naziunal, il gnieu d’utschels, a Peking. Keystone

Suenter Tokio il 1991, Osaka il 2007 e Daegu il 2011 è il campiunadi mundial d’atletica leva per la quarta giada en l’Asia. Sin Peking aveva il mund da sport gia mirà avant set onns. Il 2008 aveva Peking organisà ils gieus olimpics da stad. Ed en set onns, il 2022, organisescha la citad principala da la China lura ils gieus olimpics d’enviern.

16 atletas ed atlets svizzers

Tranter ils bun 2’000 atlets che van a la partenza a Peking ils proxims nov dis sa chattan era 14 atletas e 2 atlets svizzers. Al davos campiunadi mundial il 2013 a Moscau eran anc 18 atlets svizzers stads da la partida. Las grondas speranzas svizras giaschan sin las spatlas da Kariem Hussein, il campiun d’Europa en la cursa da 400 meters sur obstachels e sin la spatlas da Selina Büchel che parta en la cursa da currer sur 800 meters.

Trais giadas aur per Bolt?

Il superstar dal campiunadi mundial pudess danovamain daventar Usain Bolt. Il sprinter Jamaican aveva gia fatg gronda furora als gieus olimpics a Peking. Il 2008 aveva el lantschà sia carriera cun trais medaglias olimpicas dad aur. Procurar per in nov record mundial pudess il franzos Renaud Lavillenie en siglir cun l’asta. El ha gia dumagnà duas giadas l’autezza da 6 meters quest onn. Il record mundial è tar 6,14 meters tegnì da l’Ucrain Serhij Bubka.

Per spectacul vulan plinavant er Genzebe Dibaba procurar sur las distanzas da currer da 1’500 e 5’000 meters ed il Brit Mo Farah, il defensur dal titel e dubel campiun olimpic sur 5’000 e 10’000 meters.

En tut datti 47 decisiuns, vul dir i dat da gudagnar a Peking 141 medaglias.