Fin avust il grond schoc per Seraina Ulber. El gieu da supercup cunter ils Dietlikon Jets è ella passada fallà. 1-2 emnas pli tard hai dà la diagnosa ch'ella sto laschar operar vid il pe. Davent da quest mument èsi stà in cumbat cunter il temp per l'attatgadra da Piranha Cuira.
Adina stada optimistica
Suenter il schoc al cumenzament, è Seraina Ulber spert puspè stada optimistica. Ella ha lavurà mintgadi per esser fit sin il campiunadi mundial a chasa. Ensemen cun il fisioterapeut saja ella ida fin als cunfins. E quest cumbat ha valì la paina. Fin november ha ella dà ses comeback cun Piranha Cuira en il campiunadi svizzer.
Uss punctualmain sin il campiunadi mundial sun jau tar 100%.
Gia 99 gieus ha ella giugà per la squadra naziunala. In campiunadi mundial avant ils agens fans è dentant ina premiera. Per la giugadra da 29 onns è quai in punct culminant da sia carriera. E simplamain mo esser da la partida n'è betg la finamira. La gronda finamira saja dad esser en il final ils 15 da december e da gudagnar quel, di Seraina Ulber. Ella sa dentant mo bain che la Svezia è avant la Finlanda e la Svizra il grond favurit. Dapi il 2007 èn las Scandinavas adina daventadas campiunessas mundialas.
RTR actualitad 17:15