Mujinga Kambundji gudogna bronz sur 200 meters sprint al campiunadi mundial d'atletica leva. Cun in temp da 22,51 secundas è Kambundji vegnida terza. Sulettamain la Brita Dina Asher-Smith e l'Americana Britanny Brown èn stadas pli sveltas che la Svizra.
Kambundji è per la segunda Svizra che cuntanscha sin quest nivel sigl sin il podest. Sulettamain Anita Weyermann ha il 1997 era gudagnà bronz a campiunadis mundials d'atletica leva – quai sur 1500 meters.
Sprunger en il final
Lea Sprunger cuntanscha il final sur 400 meters cursa d'obstachels als campiunadis mundials a Doha. Quai cun in temp da 54,52 secundas – ses meglier temp questa stagiun. Per Sprunger èsi gia la segunda giada en seria ch'ella cuntanscha in final a campiunadis mundials. Il final è previs per quest venderdi a las 20:30.
Joseph è out
Betg tanschì per il final hai percunter per Jason Joseph sur 110 meters cursa d'obstachels. Cun in temp da 13,53 secundas è Joseph daventà segund davos en ses gir.
Il campiunadi europeic tar l'U23 n'era suenter la cursa absolut betg cuntent cun sia prestaziun. El haja fatg tut fallà quai che saja pussibel. Per Joseph èsi stà l'emprima giada ch'el ha prendì part a campiunadis mundials.
RR novitads 21:00