Siglir tar il cuntegn

Header

cuntegn

Naziunal/Internaziunal Cancellara turna enavos a la Vuelta

Malgrà sia greva cupitgada al Tour de France è il ciclist svizzer Fabian Cancellara dapi in’emna e mez puspè vid il trenar. Il Bernais ha uschia er confermà ch’el giaja a la partenza da la Vuelta, il tour da la Spagna.

L’emprim vuleva Fabian Cancellara dar ses comeback il glindesdi proxim en il rom dal tour Eneco en l’Ollanda. Cancellara ha dentant stuì revedì ses plans. «Quai saja memia baud», uschia Cancellara.

Enstagl spera Fabian Cancellara da pudair ir a la partenza a la Vuelta che cumenza ils 22 d’avust. Sia davosa gronda finamira quest onn è lura la cursa da via al campiunadi mundial la fin settember a Richmond en il stadi american Virginia.

Fabian Cancellara era stà involvì l’entschatta da fanadur en ina cupitgada en massa en la terza etappa dal Tour de France, quai sco leader dal Tour. Il Bernais ha gì rut dus spinals da las ancas. La medema blessura aveva el gia gì il mars a Harelbeke en la Belgia.

RR novitads 15.00

Artitgels legids il pli savens