Carlo Janka declassescha la concurrenza

Carlo Janka gudogna a moda suverana il Super-G sin la pista olimpica a Jeongseon en la Corea dal Sid. Igl è l'indeschavla victoria en la cuppa mundiala per Janka, l'emprima en in Super-G. Il skiunz Grischun è stà passa 80 tschientavels pli spert ch'il segund, il Talian Christof Innerhofer.

Laschar ir video «Hervorragende Fahrt von Carlo Janka»

Il gir da siemi da Carlo Janka

1:39 min, dals 7.2.2016

Terz è l'Austriac Vincent Kriechmayer cun in retard da passa ina secunda. Ils resultats dals ulteriurs Svizzers: Ralph Weber 14. (+1.79), Thomas Tumler 19. (+1.93), Beat Feuz 20 (+1.95) e Marc Gisin è sin plazza 25 (+2.44).

Premiera en il Super-G

Quest enviern ha Janka cuntanschì sulet ina giada il podest, sco terz en la cursa rapida a Kitzbühel. Ussa gudogna il skiunz da 29 onns per l'indeschavla giada ina cursa da la cuppa mundiala. Suenter quatter victorias en il slalom gigant e mintgamai trais victorias en ina cursa rapida e la super-cumbinaziun gudogna Janka per l'emprima giada in Super-G. En questa disciplina è el stà fin ussa sulet duas giadas sin il podest (2010 a Lake Louise ed il 2009 a Val Gardaina) nua ch'el è mintgamai stà segund.

RR novitads 06:00