Siglir tar il cuntegn
Inhalt

Naziunal/Internaziunal Carlo Janka siemia da Pyeongchang

I vegnia stretg ha Carlo Janka detg ad RTR. Ma tuttina spera el da pudair ir als gieus olimpics. Quai malgrà sia greva blessura dal schanugl. Ils 24 d'october aveva l'atlet rut ils lioms en crusch dal schanugl sanester en il trenament sin la Diavolezza .

Carlo Janka
Legenda: Carlo Janka Keystone

Ils 24 d’october è stà in di fatal per Carlo Janka. Il campiun olimpic da Vancouver è cupitgà en il trenament sin la Diavolezza ed ha rut ils lioms en crusch dal schanugl dretg. Sche Janka avess laschà operar il schanugl avess quai muntà la fin da la stagiun. Ma Janka ha decidì da tractar la blessura a moda conservativa – cun terapia. Uschia datti ina pitschna schanza da tuttina pudair ir als gieus olimpics che han lieu il favrer a Pyeongchang en la Corea dal Sid. Tar l’emprova generala en la Corea dal Sid aveva Janka gudagnà il super-g.

I vegnia uschia ni uschia stretg

Actualmain fa il skiunz da Sursaissa ina terapia ed exercizis da gimnastica. damai in trenament reducì u dosà. Fin ussa haja tut funcziunà bain. Sche ses giavisch dad ir als gieus olimpics sa realisescha, na sa Janka dentant betg. El na possia betg anc dir, cura ch’el possia turnar sin ils skis. Per insumma sa qualifitgar per ils gieus olimpics, stuess Carlo Janka far ina u l’autra cursa cun buns resultats il schaner. Il schaner han lieu ils classichers sco las cursas al Lauberhorn a Wengen ed al Hahnenkamm a Kitzbühel. Stretg vegnia uschia u autramain. El fetschia però tut ils sforzs per realisar ses siemi dad ir a Pyeongchang, ha ditg l'atlet en l'intervista cun RTR.

RR actualitad 07:00