Il club tudestg ha gudagnà questa stagiun per la segunda giada en sia istorgia l'uschenumnà "triple"; il titel da la Bundesliga, la cuppa tudestga e la Champions League.
Gia tar sia emprima staziun sco trenader ha Hansi Flick, il trenader da Bayern München, gudagnà quai ch'era enfin uss sulettamain gartegià a Jupp Heynckes; numnadamain da gudagnar il "triple" cun Bayern. Flick aveva surpiglià il club avant bunamain 10 mais, suenter ina terrada dad 1:5 cunter Eintracht Frankfurt. In per mais pli tard ha il Tudestg gudagnà cun Bayern tut quai ch'i dat da gudagnar en il ballape.
In titel senza menda
Tuttas 11 partidas da questa Champions League han ils Tudestgs gudagnà. Sulettamain en la fasa da k.o. ha Bayern fatg en quatter partidas 18 gols. Grazia a questa bilantscha è l'equipa da Flick er stada il favorit en il final. Quai n'han ins dentant betg pudì observar a l'entschatta dal final. Suenter in'attractiva emprima mesadad èn ils Tudestgs en la segunda mesadad vegnids pli e pli ferms, enfin che Kingsley Coman ha alura fatg en la 59avla minuta il gol decisiv per Minca.
Cravals a Paris
Suenter il final da la Champions League hai dà cravals a Paris. La polizia haja arrestà passa 20 persunas. Quai han communitgà las autoritads localas. Fans frustrads hajan dà fieu ad autos, rut fanestras e demolì butias. La polizia haja duvrà gas lacrimogen cunter ils randaladers.