Siglir tar il cuntegn

Header

video
La resumaziun da la partida
Or da Sport-Clip dals 23.08.2020.
laschar ir
cuntegn

Champions League Bayern München va per il titel

Il FC Bayern München ha gudagnà la dumengia saira a Lissabon per la 6avla giada la Champions League. En il final han els gudagnà cunter Paris Saint-Germain cun 1:0 grazia ad in gol da Kingsley Coman en la 59avla minuta.

Il club tudestg ha gudagnà questa stagiun per la segunda giada en sia istorgia l'uschenumnà "triple"; il titel da la Bundesliga, la cuppa tudestga e la Champions League.

Gia tar sia emprima staziun sco trenader ha Hansi Flick, il trenader da Bayern München, gudagnà quai ch'era enfin uss sulettamain gartegià a Jupp Heynckes; numnadamain da gudagnar il "triple" cun Bayern. Flick aveva surpiglià il club avant bunamain 10 mais, suenter ina terrada dad 1:5 cunter Eintracht Frankfurt. In per mais pli tard ha il Tudestg gudagnà cun Bayern tut quai ch'i dat da gudagnar en il ballape.

In titel senza menda

Tuttas 11 partidas da questa Champions League han ils Tudestgs gudagnà. Sulettamain en la fasa da k.o. ha Bayern fatg en quatter partidas 18 gols. Grazia a questa bilantscha è l'equipa da Flick er stada il favorit en il final. Quai n'han ins dentant betg pudì observar a l'entschatta dal final. Suenter in'attractiva emprima mesadad èn ils Tudestgs en la segunda mesadad vegnids pli e pli ferms, enfin che Kingsley Coman ha alura fatg en la 59avla minuta il gol decisiv per Minca.

video
Il gol da Coman
Or da Sport-Clip dals 23.08.2020.
laschar ir

Cravals a Paris

Suenter il final da la Champions League hai dà cravals a Paris. La polizia haja arrestà passa 20 persunas. Quai han communitgà las autoritads localas. Fans frustrads hajan dà fieu ad autos, rut fanestras e demolì butias. La polizia haja duvrà gas lacrimogen cunter ils randaladers.

RTR novitads 23:00

Artitgels legids il pli savens

Scrollar a sanestra Scrollar a dretga