Sper ses dus titels da campiun olimpic il 2008 a Peking ed il 2016 a Rio de Janeiro ed ils quatter titels da campiun mundial, mintgamai en la cursa encunter l’ura, ha Fabian Cancellara gudagnà set classichers da velo. Dals «monuments dal ciclissem» ha «Spartacus», sco quai ch’el vegn era numnà, gudagnà trais giadas Paris-Roubaix, trais giadas la cursa da la Flandra ed ina giada Milaun-Sanremo. Tant il 2010 sco er il 2013 ha el schizunt realisà il «double» cun triumfar a la cursa da la Flandra e be in’emna pli tard a Paris-Roubaix, las duas cursas sin sulada.
La fin october 2016, paucs mais suenter ses segund titel da campiun olimpic en la Brasilia, ha Fabian Cancellara terminà sia carriera. El vala sco ina dals megliers ciclists che la Svizra ha gì fin oz.
