Dominik Bieler che sa chatta en il fastizs da Fabian Cancellara po turnar a chasa cun in bun sentiment dad Alkmaar en il nord da l’Ollanda. Per ils 22 kilometers en la cursa cunter l’ura ha el duvrà 29 minutas. El ha uschia absolvì questa distanza en ina media da 46,3 km/h. Sin il victur talian Andrea Piccolo ha il ciclist grischun pers bun duas minutas. En la cursa sur la distanza lunga cun partenza en massa ha el pers be 45 secundas sin il victur Andrii Ponomar da l’Ucraina. Per in plaz sin il podest han schizunt be 23 secundas mancà.
Nagina pausa
Bler temp da sa revegnir dals campiunadis d’Europa ad Alkmaar n’ha Dominik Bieler betg. Gia quest’emna sa participescha il ciclist dal RMV Cuira als campiunadis mundials dals juniors sin il vial (Radbahn-WM) a Frankfurt Oder e sco dessert suondan la fin settember ils campiunadis mundials sin via en la regiun da Yorkshire en la Gronda Bretagna.
