La crisa da corona ha er mess sin il chau il chalender da cursas da quest onn. Uss èn las datas per la gronda part da las cursas spustadas enconuschentas. Il prim d’avust spetga cun il classicher «Strade Bianche» l’emprima cursa da la World-Tour. Durant il mais d’atun è il program da cursas lura pli che pulpì, quai sch’il coronavirus lubescha.
Termins da las pli impurtantas cursas:
- 29 d’avust – 20 da settember: Tour de France
- 20 da settember – 27 da settember: campiunadi mundial a Aigle-Martigny
- 3 d’october – 25 d’october: Giro d’Italia
- 20 d’october – 8 da november: Vuelta a Espãna
Collisiuns en il chalender
L’emprim punct culminant è il Tour de France dals 29 d’avust fin il 20 da settember. Silsuenter vai gist vinavant cun il campiunadi mundial en la Svizra franzosa. Blers ciclists pudessan dentant vegnir en in dilemma, pertge i spetga bain inqual collisiun da termin. Tranter auter sa cruschan il Giro d’Italia e la Vuelta. Durant il medem temp stattan plinavant anc trais dals gronds classichers sin il program cun Lüttich-Bastogne-Lüttich, la cursa da la Flandra e Paris-Roubaix.
Termins dals classichers da velo:
- 8 d’avust: Milaun – Sanremo
- 4 d’october: Lüttich-Bastogne-Lüttich
- 14 d’october: cursa da la Flandra
- 25 d’october: Paris – Roubaix
- 31 d’october: cursa da la Lumbardia
