Il club da hockey da Tavau ha prendì per enconuschientscha las mesiras dal Cussegl federal. Tenor il president dal HCD, Gaudenz Domenig saja stà da quintar cun questa decisiun che maximalmain 50 fans dastgan visitar a partir dad immediat ils gieus da hockey. Tuttina èsi ina decisiun che va vid l'existenza. Senza agid dal maun public, pia Confederaziun e chantun, na vegnia il club betg da surviver questa stagiun.
Sch'i va vinavant uschia, è il club plain debits a la fin da la stagiun.
Perquai dovra il HCD il sustegn. Sch'i na survegnan dentant betg daners à fonds perdu, sche lura vegnia il club anc a sentir en 10 onns quests credits.
Per Gaudenz Domenig è l'annullaziun da la stagiun 2020/2021 nagin'opziun. Quai malgrà ch'i na dat betg gieus cun fans ils proxims mais. «Uschia survegnan els tuttina anc ils daners da la televisiun». A decider en chaussa vegn dentant la Federaziun da hockey svizra. Eventualmain gia ils proxims dis.
Il president guarda cun quitads en il futur. Gaudenz Domenig vegn dentant a cumbatter per ses club, è sch'i spetga grevs mais sin il HCD.