Siglir tar il cuntegn

Header

stadion a Doha
Legenda: La populaziun dal Catar ha pauc interess dal sport d'atletica leva. Keystone
cuntegn

CM atletica leva a Doha Critica sin tuts mauns

Ils campiunadis mundials d’atletica leva a Doha en il Catar na survegnan betg bunas notas. Malgrà ina producziun perfetga da televisiun, in grondius stadion e bleras emoziuns è quest punct culminant da la stagiun sin buna via da daventar in desaster.

Per l’ina cumbattan atletas ed atlets quasi di per di avant tribunas vitas en il stadion ch’avess plaz per 40’000 fans. Ils radund 2,7 milliuns abitants dal Catar han pauc interess da quels campiunadis mundials d’atletica leva. Per l’autra procura il clima per grondas discussiuns. Durant il di è savens sur 40 grads cun in’umiditad da l’aria da radund 85%.

Nagin luxus

Per chaus cotschens e grondas discussiuns procuran la finala er ils hotels. Er plirs atlets svizzers sco per exempel Léa Sprunger u Sarah Atcho han crititgà vehement lur da chasa a Doha. Las chombras sajan fitg pitschnas, ils palantschieus bletschs e la paraids da miffa. Plinavant saja er il da magliar nunsupportabels, uschia Sarah Atcho.

sprint 100 meters da las dunnas
Legenda: Il final dal sprint da 100 meters da las dunnas (victura Shelly-Ann Fraser-Pryce) avant tribunas vitas. Keystone

Savair nagut da quels problems vul la Federaziun internaziunala d’atletica leva IAAF che defenda quels campiunadis mundials a Doha. En mintga cas na lai quest eveniment betg enavos ina buna carta da visita er en vista als proxims campiunadis mundials da ballape il 2022 ch’han medemamain lieu en il Catar.

RR actualitad 17:00