Siglir tar il cuntegn

Header

audio
5 Rumantschs da la partida al campiunadi mundial da biatlon ad Antholz
Or da Actualitad dals 12.02.2020.
laschar ir. Durada: 3 minutas 10 Secundas.
cuntegn

CM biatlon Antholz «La Valle di Anterselva vegn ad explodir»

Ils proxims 10 dis vegnan ils megliers biatlets dal mund a cumbatter per medaglias al campiunadi mundial da biatlon ad Antholz en il Tirol dal Sid. Tranter auter van era 10 biatletas e biatlets svizzers a la partenza a quest punct culminant da la stagiun.

Antholz – in Mecca dal biatlon

Il plaschair sin quest campiunadi mundial è immens tar ils Svizzers. Antholz saja in lieu tut spezial ed ins sa sentia là da chasa manegian tant Serafin Wiestner sco era las trais soras Gasparin. Antholz vala era sco ina da las regiuns principalas da biatlon insumma. Onn per onn regia ad Antholz mintgamai durant las cursas da la cuppa mundiala in’atmosfera gigantica. Perquai saja quest campiunadi mundiala pli probabel il pli grond eveniment da biatlon dapi il campiunadi mundial il 2012 a Ruhpolding en Germania, manegia Elisa Gasparin. Ed ella è schizunt persvadida che la Valle di Anterselva vegnia ad esser sco ina bumba durant ils proxims 10 dis.

biatlon ad Antholz
Legenda: Ad Antholz regia adina in'atmosfera gigantica. Keystone

La gronda schanza da turnar a chasa cun ina medaglia ha la staffetta da las dunnas cun las trais soras Selina, Elisa ed Aita Gasparin ensemen cun Lena Häcki. Quest quartet è stà en questa stagiun gia trais giadas sin il podest en quatter cursas da la cuppa mundiala.

Delegaziun svizra

Tschintg umens e tschintg dunnas da Swiss Ski vegnan ad ir a la chatscha da medaglias al campiunadi mundial ad Antholz. Il grond trumf svizzer tar ils umens è il Vallesan Benjamin Weger. Plinavant van a la partenza Mario Dolder, Jeremy Finello, Joscha Burkhalter ed il Sursilvan Serafin Wiestner. Tar las dunnas partan sper las trais soras Selina, Elisa ed Aita Gasparin er Irene Cadurisch da Malögia e Lena Häcki, la suletta ch’è stada en questa stagiun ina giada sin il podest en ina cursa singula.

RTR actualitad 17:00

Artitgels legids il pli savens