Siglir tar il cuntegn

Header

Video
Staffetta svizra vegn 6avla. La Norvegia gudogna aur.
Or da Sport-Clip dals 22.02.2020.
laschar ir
cuntegn

CM biatlon Antholz Siemi da medaglia svanescha en il stan da tir

Il podest

  • 1. plaz Norvegia 1:07:05.7
  • 2. plaz Germania + 10,7 secundas
  • 3. plaz Ucraina + 18,4 secundas
  • 6. plaz Svizra + 47,1 secundas

Per la staffetta svizra da las dunnas n’è il siemi da medaglia betg ì en vigur al campiunadi mundial da biatlon ad Antholz en il Tirol dal Sid.
Il quartet svizzer cun las soras Elisa, Selina ed Aita Gasparin e Lena Häcki sto sa cuntentar cun il sisavel plaz. Quai dat almain in diplom per las biatletas svizras ch'èn partidas cun grondas ambiziuns. En las quatter cursas da staffetta en questa stagiun han ellas numnadamain dumagnà trais giadas il pass sin il podest.

11 sbagls da sajettar

Dar oda maun l'emprima medaglia svizra insumma ad in campiunadi mundial da biatlon han las Svizras en il stan da sajettar. Oravant tut a la rutinada Selina Gasparin n'èsi betg ì sco giavischà. Ella ha fatg gist tschintg sbagls da sajettar. Uschia è l'ipoteca la finala stada memia gronda da scriver istorgia svizra ad Antholz.

Selina Gasparin
Legenda: Selina Gasparin cun il numer 2 ha tuc mo la mesadad da las schibas. Keystone

Bunas prestaziuns en il stan da tir han principal Elisa ed Aita Gasparin mussà. Ellas han omaduas tuc nov da diesch schibas. Lena Häcki ha sco davosa curridra fatg quatter sbagls da sajettar, quai dentant era perquai che la biatleta vallesana ha a la fin stuì metter tut sin ina carta per anc dumagnar il pass sin il podest.

Irene Cadurisch ha tremblà da guardar la staffetta

Ina ch’è stada extrem gnervusa durant l’entira cursa è stà Irene Cadurisch, la biatleta che valeva sco curridra da reserva. Ella ha giu fin il la davosa runda gronda speranza ch'i tanschia anc per ina medaglia. In sisavel plaz saja era bun, ed in di vegnia quella medaglia, uschia la biatleta bregagliotta.

La proxima schanza da gudagnar l'emprima medaglia svizra ad in campiunadi mundial suonda gia en in onn, lura a Pokljuka en la Slovenia. Ed en dus onns spetgan lura gia ils proxims gieus olimpics d'enviern a Peking.

Norvegia betg da franar

Triumfà ed uschia gudagnà aur en la staffetta da las dunnas ha la Norvegia. Las grondas favuritas han la finala battì per bun 10 secundas la Germania ch'è uschia per l'emprima giada sin in podest en questa stagiun. Per la surpraisa ha l'Ucraina procurà cun il terz plaz. Er per las Ucranaisas èsi l'emprim plaz da podest en questa stagiun.

Marte Olsbu Roeiseland, Tiril Eckhoff, Ingrid Landmark Tandrevold e Synnoeve Solemdal
Legenda: Las victuras norvegiaisas. Da san. Marte Olsbu Roeiseland, Tiril Eckhoff, Ingrid Landmark Tandrevold e Synnoeve Solemdal. Keystone

Las Norvegiaisas avevan gudagnà fin oz tut las quatter cursas da staffetta. Uschia è la medaglia dad aur pli che meritada. Per Marte Olsbu Roeiseland èsi schizunt la 6avla medaglia a quest campiunadi mundial ad Antholz.

RTR novitads 14:00