Nagina medaglia als campiunadis mundials ad Are en Svezia, nagin plaz da podest en la cursa rapida e schizunt be in 14avel plaz sco meglier resultat en il slalom gigant. E per finir anc ina cupitgada en il trenament per la davosa cursa rapida al final da la cuppa mundiala a Soldeu ad Andorra, ina cupitgada ch’ha er gist muntà la fin da la stagiun.
Success sulet en il super-g
Atgnamain ina stagiun d’emblidar cun excepziun dal super-g. En sia disciplina da parada ha Lara Gut-Behrami cuntanschì dus plazs da podest, segunda a San Murezzan e terza a Garmisch. Per far il pass sisum il podest n’hai dentant mai tanschì. Quai è capità la davosa giada durant la stagiun 2011/2012. Il scheftrenader da las skiunzas svizras Beat Tschuor relativescha dentant. «Lara ha stuì far ina lunga pausa suenter sia blessura als campiunadis mundials il 2017 a San Murezzan. Quai saja cler che betg tut funcziuneschia sco giavischà. Mo ina na dastga er betg sa zuppar davos ils problems.»
Michi Bont pretenda in’analisa profunda
Ussa saja impurtant da metter Lara Gut-Behrami sin la dretg via, er da chattar ina buna schliaziun cun ses team privat. Gut-Behrami vegnia dentant er a profitar en l’avegnir da las structuras da Swiss Ski, uschia Beat Tschuor. L’expert da skis tar SRF, Michi Bont, pretenda da l’auter maun che Lara Gut-Behrami giaja ussa sur ils cudeschs e ch’ella fetschia ina clera analisa, oravant tut quai che pertutga il slalom gigant. Questa disciplina fa il mument ils pli gronds quittads. Da laschar davent la disciplina slalom gigant e sa concentrar sulet pli sin las disciplinas spertas na crai Beat Tschuor dentant betg che vegni en dumonda.
RR Sportissimo 17:15
