Il Tribunal internaziunal dal sport (CAS) ha suspendì retroactiv il passlunghist norvegiais Martin Johnsrud Sundby a partir dals 11 da fanadur 2016 per dus mais.
Plinavant ha il Tribunal era annullà ils resultads da la cuppa mundiala dals 13 da december 2014 a Tavau (15 km en il stil classic) e l’etappa dal Tour de ski dals 8 da schaner 2015 a Toblach (25 km persecuziun en il stil liber). Tar omaduas cursas è Sundby vegnì testà positiv sin il med dad asma Salbutamol.
Duvrà a moda fallada
I sa tracta bain dad in med dad asma lubì, el ha dentant duvrà el a moda fallada. Quai ha communitgà la federaziun internaziunala da skis FIS suenter ina decisiun dal Tribunal internaziunal dal sport (CAS). Sundby n’ha betg sco usità duvrà il med cun in inhalatur, mabain ha el duvrà in vapurisader ed uschia surpassà la dosa lubida.
Prendì la dosa lubida
A la conferenza da medias ad Oslo ha il medi da l’equipa naziunala norvegiaisa, Knut Gabrielsen fatg a savair che Sundby n’haja betg prendì dapli che la dosa lubida. Era per la FIS n’èsi betg stà in surpassament da Sundby. Cunter quella decisiun da la FIS ha l’agentura internaziunala d’anti-doping (WADA) dentant fatg recurs.
Pers 2 titels cun stritgar 2 resultads
Cun annullar ils resultads en las cursas da Tavau e Toblach, perda Sundby uschè blers puncts, che Dario Cologna è da nov a la testa dal classament general da la stagiun 2014/15. Cunquai gudogna il passlunghist grischun gia per la quarta giada il classament general dal passlung. Dentant era Petter Northug profitescha: El erta la victoria dal Tour de ski 2015 da ses cumpatriot.
RR novitads 16:00 +