Siglir tar il cuntegn
Inhalt

Naziunal/Internaziunal Communitgar cun mauns e pes

Ils Russ fan tut il pussaivel per ch’il campiunadi mundial da ballape daventia in grond success. Els sa gidan, nua ch’i pon. Manar ina discussiun cun els u dumandar els per cussegl n’è dentant betg simpel.

Andreas Wiland.
Legenda: Da chattar l'aua preferida ha Andreas Wieland cumenzà a scurlar las buttiglias. Dumandar ina vendidra n'è betg simpel, la gronda part discurra be russ. RTR, Andreas Wieland

La gronda part discurra be russ. Be paucs che chapeschan e discurran intgins pleds englais. Oravant tut persunas ch’èn a la front sco per exempel a la recepziun d'hotels. Mender èsi en restaurants u en stizuns. Cura che jau hai dumandà la vendidra per englais tge aua che saja natirala e tgenina minerala, hai jau survegnì ina resposta ch’ha gidà mai pauc. Russ na chapesch jau betg. Leger, tge che stat scrit sin la buttiglia gida er pauc. Perfin la scrittira è autra en Russia, almain la gronda part dals bustabs èn auters.

Per la finala chattar mia aua preferida hai jau cumenzà a scurlar las buttiglias per uschia chattar ora, tgenina ch’è cun gas e tgenina senza. Ma er quai è grev, damai che las buttiglias en Russia èn emplenidas enfin il viertgel. La finala ma sun jau decidì da cumprar pliras differentas buttiglias per uschia almain avair ina buttiglia cun aua minerala ed esser da la vart segira.

RR actualitad 17:00