Siglir tar il cuntegn

Coppa Davis Duo svizzer perda cunter ils Svedais

Il duo svizzer Antoine Bellier et Luca Margaroli han pers 6-2 6-2 6-4 en 1h42' cunter il duo Markus Eriksson/Robert Lindstedt. En il duel da Coppa Davis mainia uschia la Svezia cun 2-1 cunter la Svizra, rapporta l’agentura da novitads svizra SDA.

Portrait dals dus svizzers.
Legenda: Il duo svizzer Bellier/Margaroli han pers 6-2 6-2 6-4 en 1h42' cunter il duo Eriksson/Lindstedt. Keystone

Il genevrin Bellier ed il tessinais Margaroli n’hajan durant tut il match mai gì il nas davantvart. Il match haja schizunt cumenzà cun in «scenario da catastrofa» per ils dus giugaders svizzers: Els han pers tuts dus lur emprim gieu da service ed eran gia suenter l’emprim quart d’ura 0-4 en disavantatg, scriva la SDA.

La dumengia èn ils gieus singuls sil program. L'emprim fa Henri Laaksonen (ATP 120), il numer 1, cunter Markus Eriksson (ATP 455). Tenor nominaziun oriunda gioga suenter Marc-Andrea Hüsler (ATP 386) cunter Jonathan Mridha (ATP 1094). Ils dus chapitanis da las squadras san dentant adina midar lur nominaziuns.

RR novitads 16:00