Tschintg giugaders da l'emprima equipa dal Club da hockey Tavau èn vegnids testads positiv sin Covid-19. En consequenza sa chatta l'entira equipa en quarantina enfin ils 27 da november. Quai scriva il club sin sia pagina d'internet. Tuttina possia il trenament cuntinuar per part: Tenor la media chantunala possian ils giugaders che n'èn betg vegnids testads positiv sin Covid-19 trenar en ina uschenumnada «Bubble», pia tranter els, scriva il HCD vinavant.
Avant che la quarantina finescha, stoppia l'entira equipa anc far in test da corona.
Gieus spustads
Per il manaschi da la National League muntan ils cas da corona che ulteriuras partidas ston vegnir spustadas. Duas partidas na po il HCD betg dar: ina cunter ils SCL Tigers (20 da november) e l'autra cunter Fribourg-Gottéron (27 da november). Il gieu da sonda cunter Losanna era gia spustà.
Da las 12 equipas en la National League han gia bunamain tuttas gì cas da corona e cunquai stuì ir en quarantina. Il SC Berna furma enfin uss la suletta excepziun.
