Siglir tar il cuntegn
Inhalt

Naziunal/Internaziunal Crimi tranter ils Wallabies ed ils Scots

Sco davosa equipa ha l’Australia cuntanschì ils mezfinals al campiunadi mundial da rugby en l’Engalterra e Wales. Ils Wallabies han gudagnà en il stadion Twickenham da Londra il quartfinal encunter la Scozia, quai a moda dramatica cun 35:34.

Australia encunter Scozia al campiunadi mundial da rugby en l'Engalterra.
Legenda: L’Australian Adam Ashley-Cooper cun in try encunter la Scozia. Keystone

La decisiun a favur per ils Australians è crudada en la davosa minuta. Suenter in foul dals Scots ha Bernard Foley nizzegià in penalti ed uschia anc pudì volver ils resultat e manar ils Wallabies en la proxima runda. En il mezfinal frunta l’Australia sin l’Argentina.

Los Pumas tramettan a chasa ils Irlandais

Ils Argentins han battì en il quartfinal l’Irlanda cun 43:20. Suenter 13 minutas pareva la partida a Cardiff gia dad esser decidia. Los Pumas sco quai ch’ils Argentins vegnan era numnads manavan gia cun 17:0. Silsuenter han ils Irlandais prendì il gieu enta maun e pudì scursanir al 20:23 suenter bun in’ura. A la fin han ils Argentins dentant gì dapli reservas ed fatg tut cler en quest gieu da quartfinal.

RR novitads 22.00