Nino Schurter ha pers 2:33 minutas en ina cursa sut cundiziuns fitg spezialas, betg quellas ch’el avess giavischà. Schurter n’è davent da la partenza betg vegnì a frida cun las relaziuns a Leogang. Sper la buglia ha il vent buffà ed igl è stà fraid, betg l’aura ch’il mountainbiker da 34 onns preferescha. Plinavant n'haja el er betg gì bunas chommas avunda per cumbatter per ina medaglia, uschia Nino Schurter curt suenter la cursa.
Mathias Flückiger gudogna argient
Persvadì ha ord vista svizra oravant tut Mathias Flückiger. El è vegnì bain a frida cun las cundiziuns a Leogang ed ha sco l’onn passà gudagnà la medaglia d’argient. Il 2019 a Mont Sainte-Anne en il Canada era Flückiger daventà vice-campiun mundial davos Nino Schurter. Il Bernais era gia stà sin il podest al davos campiunadi mundial a Leogang. Il 2012 er’el vegnì terz davos Schurter e ses frar Lukas Flückiger.
Franzos procuran per la show
Sco gia tar las dunnas ha er en la cursa dals umens in Franzos procurà per la musica. Jordan Sarrou ha gia baud pudì sa distanziar da la concurrenza ed ha la finala triumfà cun in avantatg da 45 secundas sin Mathias Flückiger. Per Sarrou è quest titel il pli grond success da la carriera. Enfin ussa es el stà be duas giadas sin in podest da la cuppa mundiala, dentant anc mai il pli sisum.
Er la medaglia da bronz va a l’equipa franzosa. Titouan Carod ha cuntanschì l’arrivada be 10 secundas davos Mathias Flückiger. Ina buna prestaziun ha er Filippo Colombo mussà. Il giuven Tessinais è vegnì 7avel cun in retard da 2:12 minutas ed è uschia stà il segund meglier svizzer. Lars Forster, il collega d'equipa da Nino Schurter e ch'ha triumfà ensemen cun Schurter al Swiss Epic, è vegnì cun in retard da passa quatter minutas be 20avel.