Siglir tar il cuntegn

Header

video
Intervista cun Nino Schurter
Or da Actualitad dals 11.08.2019.
laschar ir. Durada: 1 minuta 33 Secundas.
cuntegn

Cross Country Van der Poel puspè avant Nino Schurter

Il mountainbiker oriund da Tersnaus, Nino Schurter, è vegnì segund en la cursa da la cuppa mundiala a Lai. Sulet il giuven talent Mathieu van der Poel ha battì il campiun mundial avant ses fans da chasa.

Ditg èsi stà in cumbat fitg stretg tranter Schurter e Van der Poel. En la segunda ultima runda ha l'Ollandais dentant augmentà talmain la cadenza che Nino Schurter ha stuì laschar scappar il giuven da 24 onns.

  • Mathieu Van der Poel triumfescha a Lai e festivescha sia terza victoria en ina cursa roiala da cross country da la cuppa mundiala.
  • Nino Schurter sco segund perda la finala 25 secundas sin Van der Poel.
  • Cun Mathias Flückiger sco terz dumogna in ulteriur svizzer il pass sin il podest a la cursa da chasa. El perda bun ina minuta sin Van der Poel.

audio
Saira: Mountainbike – intervista cun Nino Schurter davart la cursa da cross country
ord Sportissimo dals 11.08.2019.
laschar ir. Durada: 2 minutas 4 Secundas.

Uschia sto Nino Schurter er avair vinavant pazienza d'egualisar il record dal Franzos Julien Absalon ch'ha gudagnà 33 cursas da la cuppa mundiala. Nino Schurter resta sin 32 victorias. Grazia al segund plaz a Lai è il Grischun dentant sin buna via da gudagnar per la 7avla giada il classament general da la cuppa mundiala, quai er perquai che Mathieu van der Poel desista sin la davosa cursa en ils Stadis Unids.

video
Impressiuns da la cursa da Cross Country a Lai
Or da Actualitad dals 11.08.2019.
laschar ir. Durada: 1 minuta 39 Secundas.

Davos duel tranter Schurter e Van der Poel

Igl è stà ad interim l'ultim duel tranter l'Ollandais ed il Grischun. Van der Poel desista er sin il campiunadi mundial en il Canada per uschia sa concentrar sin las proximas cursas cun il velo da via. Uschia parta Nino Schurter sco il grond favurit vers Mount Sainte-Anne. Ses pli concurrent a quest punct culminant da la stagiun vegn ad esser Mathias Flückiger ch'ha gudagnà sia emprima cursa da la cuppa mundiala gist sin quest percurs dals campiunadis mundials 2019.

Dira cursa per Andrin Beeli

Betg i sco giavischà, almain quai che pertutga il resultat, èsi ad Andrin Beeli da Sagogn. El è adina stà enturn la posiziun 80. Damai ch'ils emprims avevan a la fin gia ina runda avantatg sin il Sursilvan ha el stuì terminar la cursa gia avant la runda finala. Per Andrin Beeli èsi stà la davosa cursa da la cuppa mundiala en questa stagiun. Ses proxim punct culminant è il Swiss Epic che cumenza en bun in'emna a Tavau.

audio
Saira: Andrin Beeli da Sagogn davart la «cursa dira»
ord Sportissimo dals 11.08.2019.
laschar ir. Durada: 4 minutas 35 Secundas.

Victoria svizra tar ils umens U23

A la fin da la festa da mountainbike hai tuttina anc dà ina victoria svizra. Filippo Colombo ha gudagnà la cursa da cross country dals U23. En in sprint final ha il Tessinais battì piz a cup il Rumen Vlad Dascalu. Terz cun in retard d'ina mesa minuta è vegnì il Spagnol Jofre Cullell Estape.

Duo Sursilvan betg tranter ils pli sperts

Betg i sco giavischà èsi al duo sursilvan cun Vital Albin ed Ursin Spescha. Vital Albin ch'è tranter auter cupitgà en l'emprima runda ha la finala stuì sa cuntentar cul il 39avel plaz, Ursin Spescha ch'ha battì durant las davosas rundas da mal il dies è daventà 41avel. Omadus han pers passa tschintg minutas sin il victur Filippo Colombo.

Uss suonda il punct culminant

Il punct culminant da la stagiun spetga lura la fin dal mais cun ils campiunadis mundials da mountainbike a Mount Sainte-Anne. Vital Albin, Ursin Spescha e sa chapescha er Nino Schurter sgolan il venderdi, ils 23 d'avust vers il Canada. L'entschatta settember stat lura anc la davosa cursa da la cuppa mundiala sin il program, quai a Snowshoe en ils Stadis Unids.

Sportissimo 11.08.2019

Artitgels legids il pli savens