Naziunal/Internaziunal - Cuira Unihockey: Iivo Pantzar remplazza Jani Westerlund
Cuira Unihockey sa separa per immediat da ses trenader Jani Westerlund. Sco nov trenader vegn engaschà Iivo Pantzar. La decisiun saja crudada suenter l'analisa da l'ultima stagiun ed en vista a la nova. Quai communitgescha il club da la chapitala.
Davent da la nova stagiun trenescha Iivo Pantzar il team da la liga naziunala A. L'um da 39 onns da la Finlanda è gia stà a la banda dals da Cuira dal 2015 fin il 2017. Pantzar vegn gia ad esser preschent la stad per pliras emnas a Cuira. Davent dal prim d'avust vegn el ad abitar stabel en la chapitala dal Grischun.
Team vegn cumplettà cun giuven talent da la Finlanda
Ensemen cun Pantzar mida era Kim Hyrkkönen tar Cuira. Il giuven e talentà giugader ha fatg la davosa stagiun sias emprimas experientschas en la pli auta liga finlandaisa. Il giuven da 18 onns mida da Koovee a Cuira.
