En la cursa da cumbinaziun daventa la Svizra Wendy Holdener segunda. Suenter il super-G èsi bain gartegià ad ella da far bun in plaz en la cursa da slalom. Pudì cuntanscher las spetgas da gudagnar la cumbinaziun, n'ha ella cun quai dentant betg.
Gudagnà la cursa da cumbinaziun a Zauchensee ha la Taliana Federica Brignone – quai cun in avantatg da 15 tschientavels secunda sin Holdener. Il podest cumplettescha cun Marta Bassino in'ulteriura Taliana.
Holdener terza suenter super-G
Suenter il super-G da la cumbinaziun da las dunnas a Zauchensee, aveva Wendy Holdener stgaffì ina buna situaziun da partenza per il slalom. La Svizra era terza, quai cun in retard d'ina mesa secunda sin la pli sperta, la Taliana Federica Brignone. Sin plaz dus era sia cumpatriota, Marta Bassino.
Dasper Wendy Holdener èn stadas duas ulteriuras svizras da la partida en il slalom; Nathalie Gröbli è il mument 8avla e Rahel Kopp 21avla. Michelle Gisin, Priska Nufer e Jasmina Sutter èn crudadas ora – uschia er l'Americana Mikaela Shiffrin.
RTR novitads 11:00